Home » ആരോഗ്യം » നാല് ദിവസമായി തുടരുന്ന ഡോക്ടർമാരുടെ സമരം പിൻവലിച്ചു

നാല് ദിവസമായി തുടരുന്ന ഡോക്ടർമാരുടെ സമരം പിൻവലിച്ചു

നാല് ദിവസമായി തുടരുന്ന ഡോക്ടർമാരുടെ സമരം പിൻവലിച്ചു. ആരോഗ്യമന്ത്രി കെ കെ ശൈലജയുമായി ചർച്ച നടത്തിയ ശേഷമാണ് ഡോക്ടർമാർ സമരം പിൻവലിച്ചത്. ഇന്നലെ രാത്രി ഏഴ് മണിയോടെ ചർച്ചക്കായി കെജിഎംഒഎ ഭാരവാഹികൾ മന്ത്രിയുടെ ഓഫീസിലെത്തുകയായിരുന്നു

സമരം നിർത്താതെ ഡോക്ടർമാരുമായി ചർച്ചക്കില്ലെന്ന് മന്ത്രി രാവിലെ വ്യക്തമാക്കിയിരുന്നു. എന്നാൽ ഐഎംഎയുടെ ഇടപെടലാണ് ഒത്തുത്തീർപ്പിന് കളമൊരുക്കിയത്. സസ്‌പെൻഷനിലുള്ള ഡോക്ടർമാർ മാപ്പപേക്ഷ എഴുതി നൽകിയാൽ തിരിച്ചെടുക്കാമെന്ന് മന്ത്രി വ്യക്തമാക്കുകയായിരുന്നു. ആർദ്രം മിഷനുമായി സഹകരിക്കാമെന്ന് ഡോക്ടർമാരും ഉറപ്പ് നൽകി.

ആർദ്രം പദ്ധതിയുമായി ബന്ധപ്പെട്ട് കുടുംബാരോഗ്യ കേന്ദ്രങ്ങളിൽ ഉച്ചക്ക് 2 മണി മുതൽ വൈകുന്നേരം 6 മണിവരെ സായാഹ്ന ഒ പി ആവശ്യപ്പെട്ടതാണ് ഡോക്ടർമാരുടെ പ്രതിഷേധത്തിനിടയാക്കിയത്. തുടർന്ന് ഇവർ ഒപിയിൽ കയറാതെ അനിശ്ചിതകാല സമരം പ്രഖ്യാപിക്കുകയായിരുന്നു. എന്നാൽ ഡോക്ടർമാർക്കെതിരെ കടുത്ത നടപടിക്ക് സർക്കാർ തയ്യാറെടുക്കുന്നതിനിടെയാണ് ഇവർ സ്വമേധയാ സമരം പിൻവലിച്ചത്.

കെ.ജി.എം.ഒ.എ. നാല് ദിവസമായി നടത്തിവന്നിരുന്ന സമരം പിന്‍വലിച്ചു. ഇപ്പോൾ നടത്തിയ ചര്‍ച്ചയെ തുടര്‍ന്നാണ് സമരം പിന്‍വലിച്ചത്.

പ്രധാന തീരുമാനങ്ങള്‍

1. കുടുംബാരോഗ്യ കേന്ദ്രങ്ങളില്‍ വൈകുന്നേരം വരെയുള്ള ഒ.പി.യുമായി സഹകരിക്കും
2. ഈ കേന്ദ്രങ്ങളില്‍ കുറഞ്ഞത് 3 ഡോക്ടര്‍മാരെ ഉറപ്പ് വരുത്തും. നിലവില്‍ പ്രവര്‍ത്തന സജ്ജമായ കുടുബാരോഗ്യ കേന്ദ്രങ്ങളില്‍ ഇപ്പോള്‍ തന്നെ 3 ഡോക്ടര്‍മാരുണ്ട്. ഇനിയുള്ള കേന്ദ്രങ്ങളിലും അത് ഉറപ്പുവരുത്തും.
3. ഇവര്‍ ലീവെടുക്കുന്ന ദിവസങ്ങളില്‍ പകരം സംവിധാനം ഏര്‍പ്പെടുത്തുന്നതിന് ജില്ലാ മെഡിക്കല്‍ ഓഫീസറും ജില്ലാ പ്രോഗ്രാം മാനേജറും നേതൃത്വം നല്‍കുന്ന റിസര്‍വ് ടീം ഉണ്ടാക്കും.
4. രോഗികളുടെ വര്‍ധനവുള്ള കേന്ദ്രങ്ങളില്‍ ഘട്ടം ഘട്ടമായി അവശ്യമെങ്കില്‍ കൂടുതല്‍ ഡോക്ടര്‍മാരെ കൂടുതലുള്ള കേന്ദ്രങ്ങളില്‍ നിന്നും പുനര്‍വിന്യസിക്കുന്ന കാര്യം ആലോചിക്കും. ഇക്കാര്യം സര്‍ക്കാര്‍ മുന്‍കൂട്ടി കണ്ടിരുന്നു.
5. ആര്‍ദ്രം മിഷന്റെ ഭാഗമായ കുടുംബാരോഗ്യ കേന്ദ്രങ്ങളുടെ നടത്തിപ്പുമായി ബന്ധപ്പെട്ടുള്ള പ്രായോഗിക വിഷമതകള്‍ പരിഹരിക്കാന്‍ ആരോഗ്യ വകുപ്പ് അഡീഷണല്‍ ചീഫ് സെക്രട്ടറിയുടെ നേതൃത്വത്തില്‍ ഒരു കമ്മിറ്റിയെ രൂപീകരിച്ച് കെ.ജി.എം.ഒ.എ. പ്രതിനിധികള്‍ അടക്കമുള്ളവരുമായി ചര്‍ച്ച നടത്തുകയും ചെയ്യും. മേയ് ആദ്യവാരം മന്ത്രിതല ചര്‍ച്ച നടത്തും.
6. അനധികൃതമായി ജോലിയില്‍ പ്രവേശിക്കാത്ത കാരണം കൊണ്ട് സസ്‌പെന്റ് ചെയ്ത ഡോക്ടര്‍ വിശദീകരണം നല്‍കിയാല്‍ നടപടി ഒഴിവാക്കും
7. അവിചാരിതമായി ഡോക്ടര്‍മാരുടെ സംഘടന നടത്തിയ മിന്നല്‍ സമരത്തില്‍ ജനങ്ങള്‍ക്കുണ്ടായ ബുദ്ധിമുട്ടില്‍ മന്ത്രി അമര്‍ഷം രേഖപ്പെടുത്തി.

കെ.ജി.എം.ഒ.എ. ഭാരവാഹികൾ പങ്കെടുത്തു.

Leave a Reply