Home » ന്യൂസ് & വ്യൂസ് » മൂന്നാര്‍ പൊളിക്കലില്‍ മുഖ്യമന്ത്രിക്ക് അതൃപ്തി; കളക്ടറെ ശാസിച്ചു

മൂന്നാര്‍ പൊളിക്കലില്‍ മുഖ്യമന്ത്രിക്ക് അതൃപ്തി; കളക്ടറെ ശാസിച്ചു

മുഖ്യമന്ത്രി ജില്ലാ കളക്ടറെ വിളിച്ച് ശാസിച്ചതായാണ് റിപ്പോര്‍ട്ട്. മൂന്നാര്‍ വിഷയം കൈകാര്യം ചെയ്യുന്നതില്‍ ജാഗ്രതക്കുറവുണ്ടായെന്നും ഒഴിപ്പിക്കല്‍ നടപടികളില്‍ കൂടിയാലോചന വേണമായിരുന്നെന്നും മുഖ്യമന്ത്രി പറഞ്ഞു.

തിരുവനന്തപുരം: മൂന്നാറില്‍ കുരിശു പൊളിച്ച നടപടിയില്‍ അതൃപ്തി അറിയിച്ച് മുഖ്യമന്ത്രി പിണറായി വിജയന്‍. വിഷയത്തില്‍ ജില്ലാ ഭരണകൂടം കുറെക്കൂടി ജാഗ്രതയും ശ്രദ്ധയും കാണിക്കണമായിരുന്നെന്ന് മുഖ്യമന്ത്രി പറഞ്ഞതായാണ് റിപ്പോര്‍ട്ട്.
മുഖ്യമന്ത്രി ജില്ലാ കളക്ടറെ വിളിച്ച് ശാസിച്ചതായാണ് റിപ്പോര്‍ട്ട്. മൂന്നാര്‍ വിഷയം കൈകാര്യം ചെയ്യുന്നതില്‍ ജാഗ്രതക്കുറവുണ്ടായെന്നും ഒഴിപ്പിക്കല്‍ നടപടികളില്‍ കൂടിയാലോചന വേണമായിരുന്നെന്നും മുഖ്യമന്ത്രി പറഞ്ഞു.
പൊളിക്കലല്ല സര്‍ക്കാര്‍ നയം. ഏറ്റെടുക്കുകയാണ് വേണ്ടത്. സര്‍ക്കാര്‍ ഭൂമിയെന്ന് ഉറപ്പുണ്ടെങ്കില്‍ അക്കാര്യം കാണിച്ച് ഭൂമിയില്‍ ബോര്‍ഡ് വെച്ചാല്‍ മതിയായിരുന്നെന്നും മുഖ്യമന്ത്രി കളക്ടറോട് വ്യക്തമാക്കി.
കുരിശ് പൊളിച്ചത് തെറ്റിദ്ധാരണ ഉണ്ടാക്കുന്ന നടപടിയാണെന്ന് പിണറായി കോട്ടയത്ത് പൊതുപരിപാടിയില്‍ പറഞ്ഞു. കുരിശ് എന്തുപിഴച്ചു? ഇത്തരം കാര്യങ്ങള്‍ ചെയ്യുമ്പോള്‍ ഇവിടെ ഉത്തരവാദിത്വപ്പെട്ട സര്‍ക്കാരുണ്ടെന്ന് ആലോചിക്കേണ്ടതല്ലേ.
കുരിശ് എന്നത് വലിയൊരു വിഭാഗം ജനങ്ങള്‍ വിശ്വസിക്കുന്ന പ്രതീകമാണ്. ഇത്തരത്തിലുള്ള കാര്യങ്ങള്‍ തെറ്റിദ്ധാരണയുണ്ടാക്കുന്നതാണ്. സര്‍ക്കാരിന്റെ നടപടികള്‍ ഒരു വിഭാഗത്തിനെതിരെയാണെന്ന തോന്നലുണ്ടാക്കാന്‍ ഇടവരുത്തുന്നതാണ് ഇത്തരം നടപടികളെന്നും ഇത് സര്‍ക്കാരിന് ഭൂഷണമല്ലെന്നും അദ്ദേഹം പറഞ്ഞു.
കൂടുതല്‍ കാര്യങ്ങള്‍ ഇപ്പോള്‍ പറയുന്നില്ല. ബാക്കി കാര്യങ്ങള്‍ നാളെ തീരുമാനിക്കുമെന്നും അദ്ദേഹം പറഞ്ഞു.

Leave a Reply