Home » ന്യൂസ് & വ്യൂസ് » വിദേശത്ത് നിന്ന് മൃതദേഹം നാട്ടിലെത്തിക്കാന്‍ പുതിയ നിബന്ധനകള്‍
Dead Body

വിദേശത്ത് നിന്ന് മൃതദേഹം നാട്ടിലെത്തിക്കാന്‍ പുതിയ നിബന്ധനകള്‍

വിദേശത്ത് നിന്ന് മൃതദേഹം നാട്ടിലെത്തിക്കാന്‍ പുതിയ നിബന്ധന. മൃതദേഹം അയക്കുന്നതിന് 48 മണിക്കൂര്‍ മുന്‍പ് നാട്ടിലെ വിമാനത്താവളത്തില്‍ രേഖകള്‍ എത്തിക്കണം. മൃതദേഹം നാട്ടിലെത്തിക്കാന്‍ നാല് ദിവസമെങ്കിലും എടുക്കുമെന്നുമാണ് റിപ്പോര്‍ട്ട്. നിലവില്‍ ഒറ്റദിവസം കൊണ്ട് ഗള്‍ഫില്‍ നിന്ന് മൃതദേഹം നാട്ടിലെത്തിക്കാന്‍ കഴിയുമായിരുന്നു.

മരണസര്‍ട്ടിഫിക്കറ്റ്, എംബാമിങ് സര്‍ട്ടിഫിക്കറ്റ്, ഇന്ത്യന്‍ എംബസിയുടെ എന്‍ഒസി, റദ്ദാക്കിയ പാസ്‌പോര്‍ട്ടിന്റെ പകര്‍പ്പ് എന്നിവയാണു ഹാജരാക്കേണ്ടത്. രേഖകള്‍ ഇംഗ്ലീഷില്‍ ആയിരിക്കണം. അംഗീകൃത ട്രാന്‍സ്ലേറ്റര്‍ ഇംഗ്ലീഷിലേക്ക് പരിഭാഷപ്പെടുത്തിയാലും മതി. രേഖകളുമായി ബന്ധുക്കള്‍ വിമാനത്താവളത്തിലെത്തുകയോ വിമാനത്താവളത്തിലേക്ക് നേരിട്ട് ഇമെയില്‍ ചെയ്യുകയോ ചെയ്യാം. ഈ നിബന്ധന്ന സര്‍ക്കാര്‍ ഉദ്യോഗസ്ഥര്‍ക്ക് കൈക്കൂലി വാങ്ങാന്‍ വഴിയൊരുക്കുന്ന ഘട്ടത്തില്‍ തന്നെ സാധാരണക്കാര്‍ക്ക് ഏറെ ബുദ്ധിമുട്ടുണ്ടാക്കുകയും ചെയ്യും. കേന്ദ്ര ആരോഗ്യമന്ത്രാലയത്തിന്റെ നിര്‍ദേശപ്രകാരം വിവിധ വിമാനത്താവളങ്ങളിലെ ഹെല്‍ത്ത് ഓഫീസര്‍മാരാണ് ഇതു സംബന്ധിച്ച ഉത്തരവിറക്കിയത്.

മൃതദേഹത്തോടൊപ്പം വരുന്നവര്‍ എമിഗ്രേഷനു സമീപമുള്ള ഹെല്‍ത്ത് കൗണ്ടറില്‍ രേഖകളുടെ ഒറിജിനലുകള്‍ കാണിക്കുകയും വേണം. സര്‍ട്ടിഫിക്കറ്റില്‍ മരണകാരണം വ്യക്തമായി രേഖപ്പെടുത്തിയിരിക്കണം. കാരണം വ്യക്തമായി പറയാന്‍ സാധിക്കാത്ത കേസുകളില്‍ ഗുരുതര പകര്‍ച്ചവ്യാധികള്‍ ബാധിച്ചല്ല മരണമെന്ന് അതതു രാജ്യത്തെ ആരോഗ്യവകുപ്പ് സാക്ഷ്യപ്പെടുത്തണം. അന്താരാഷ്ട്ര ആരോഗ്യ ചട്ടങ്ങളും ഇന്ത്യന്‍ വിമാന പൊതു ആരോഗ്യ ചട്ടങ്ങളും അനുസരിച്ചാണ് ഇപ്പോഴത്തെ മാറ്റമെന്നാണ് കരിപ്പൂരിലെ ഹെല്‍ത്ത് ഇന്‍സ്‌പെക്ടര്‍ പുറത്തിറക്കിയ കുറിപ്പില്‍ പറയുന്നുത്.

മരണം നടന്ന രാജ്യത്തെ പൊലീസിന്റെയും മറ്റു അധികൃതരുടെയും ഇന്ത്യന്‍ എംബസി അധികൃതരുടെയും നിരവധി സര്‍ട്ടിഫിക്കറ്റുകള്‍ ഹാജരാക്കിയാല്‍ നിലവില്‍ മൃതദേഹങ്ങള്‍ മരിച്ച ദിവസമോ, അല്ലെങ്കില്‍ പിറ്റേന്നോ നാട്ടിലെത്തിക്കാനാവുന്നുണ്ട്. എന്നാല്‍ പുതിയ ഉത്തരവ് പ്രകാരം ഇത് സാധിക്കില്ല. ഇതുകൂടാതെ മരണ സര്‍ട്ടിഫിക്കറ്റില്‍ മരണ കാരണം വ്യക്തമായി രേഖപ്പെടുത്തണമെന്നും നിര്‍ദേശമുണ്ട്. അങ്ങനെ പറയാന്‍ സാധിക്കാത്ത മരണങ്ങളില്‍ പകര്‍ച്ചവ്യാധിയോ അന്താരാഷ്ട്ര ആരോഗ്യ മേഖലയില്‍ നോട്ടിഫൈ ചെയ്ത രോഗമോ അല്ല മരണകാരണമെന്ന് അതത് രാജ്യത്തെ ആരോഗ്യ വകുപ്പ് സാക്ഷ്യപ്പെടുത്തണം.

പുതിയ ഉത്തരവ് അടിയന്തരമായി നടപ്പാക്കണമെന്ന് വിമാനത്താവളങ്ങളിലെ ആരോഗ്യവിഭാഗം വിമാനക്കമ്പനികളോട് ആവശ്യപ്പെട്ടിട്ടുണ്ട്. കേന്ദ്ര ആരോഗ്യമന്ത്രാലയത്തിന്റെ നിര്‍ദ്ദേശം അനുസരിച്ച് വിവിധ വിമാനത്താവളങ്ങളിലെ ഹെല്‍ത്ത് ഓഫീസര്‍മാരാണ് ഇത് സംബന്ധിച്ച ഉത്തരവ് ഇറക്കിയിരിക്കുന്നത്.

Leave a Reply