Calicut Journal The heartbeat of malabar
കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിയുടെ വാഹനവ്യൂഹത്തിന് നേരെ കല്ലേറ്. ബനസ്‌കന്ധ മേഖലയില്‍ പ്രളയ മേഖല സന്ദര്‍ശിക്കുന്നതിനിടെയാണ് സംഭവം. ആക്രമണത്തില്‍ രാഹുലിന്റെ സുക്ഷാ ഉദ്യോഗസ്ഥന് പരിക്കേറ്റു. ബി.ജെ.പിയാണ് ഇതിന് പിന്നിലെന്ന് കോണ്‍ഗ്രസ് വക്താവ് മനു അഭിഷേക് സിങ്‌വി ആരോപിച്ചു.
ദരേലയിലെ ലാല്‍ ചൗക്കില്‍ സന്ദര്‍ശനം നടത്തുന്നതിനിടെ ആള്‍ക്കൂട്ടത്തിനിടെ നിന്നും സിമന്റ് കട്ടകൊണ്ട് അജ്ഞാതന്‍ എറിയുകയായിരുന്നു. ഒഴിഞ്ഞു മാറിയതുകൊണ്ടാണ് അദ്ദേഹം പരിക്കേല്‍ക്കാതെ രക്ഷപ്പെട്ടതെന്ന് കോണ്‍ഗ്രസ് നേതാക്കള്‍ പറഞ്ഞു. ആക്രമണത്തില്‍ രാഹുലിന്റെ കാറിന്റെ ചില്ല് തകര്‍ന്നു. ഇതുകൊണ്ടൊന്നും പ്രതിപക്ഷത്തെ നിശ്ശബ്ദമാക്കാന്‍ കഴിയില്ലെന്ന് മനു അഭിഷേക് സിങ്‌വി പറഞ്ഞു.
ഗുജറാത്തില്‍ വെള്ളപ്പൊക്കം രൂക്ഷമായി ബാധിച്ച ബനസ്‌കന്ധ മേഖലയില്‍ ആറ് കോണ്‍ഗ്രസ് എം.എല്‍.എമാരുണ്ട്. എന്നാല്‍ ഇവരെയെല്ലാം രാജ്യസഭാ തിരഞ്ഞെടുപ്പുമായി ബന്ധപ്പെട്ട നാടകങ്ങളുടെ ഭാഗമായി ബെംഗലുരുവിലെ റിസോട്ടില്‍ താമസിപ്പിച്ചിരിക്കുകയാണ്. ആറ് കോണ്‍ഗ്രസ് അംഗങ്ങള്‍ പാര്‍ട്ടി വിട്ടതിനേത്തുടര്‍ന്നാണ് മറ്റുള്ളവരേയും കൊണ്ട് നേതൃത്വം ബെംഗലുരുവിലേക്ക് കടന്നത്.
