Calicut Journal The heartbeat of malabar
മഴക്കാലത്ത് ഷൂസും സോക്‌സും ധരിക്കാന്‍ കുട്ടികളെ നിര്‍ബന്ധിക്കരുതെന്ന് ബാലാവകാശസംരക്ഷണ കമ്മീഷന്റെ പുതിയ ഉത്തരവ്. മഴക്കാലത്ത് യൂണിഫോമിനൊപ്പം ഷൂസും സോക്‌സും ധരിക്കാന്‍ കുട്ടികളെ നിര്‍ബന്ധിക്കരുതെന്നും അനുയോജ്യമായ ചെരുപ്പോ മറ്റോ അണിഞ്ഞാല്‍ മതിയെന്നും സംസ്ഥാന ബാലാവകാശ സംരക്ഷണ കമ്മീഷന്‍ നിര്‍ദ്ദേശിച്ചു.
മഴക്കാലത്ത് നനഞ്ഞ ഷൂസും സോക്‌സും ധരിച്ച് ക്ലാസില്‍ ഇരിക്കേണ്ടി വരുന്നത് കുട്ടികളില്‍ അസുഖത്തിന് കാരണമാകുന്നുവെന്ന് ചൂണ്ടിക്കാട്ടി ഒരു രക്ഷിതാവ് നല്‍കിയ പരാതി പരിഗണിച്ചാണ് കമ്മീഷന്റെ പുതിയ ഉത്തരവ്.
ഇക്കാര്യം വ്യക്തമാക്കി സംസ്ഥാനത്തെ മുഴുവന്‍ സ്‌കൂളുകള്‍ക്കും നിര്‍ദ്ദേശം നല്‍കണമെന്ന് പൊതുവിദ്യാഭ്യാസ ഡയറക്ടര്‍, സെക്രട്ടറി, സി.ബി.എസ്.സിയുടെ തിരുവനന്തപുരത്തെ റീജണല്‍ ഓഫീസര്‍ എന്നിവരെ കമ്മീഷന്‍ അറിയിച്ചു. ഇത് സംബന്ധിച്ച വിദ്യാഭ്യാസ വകുപ്പിന്റെ തീരുമാനം ഉടന്‍ കമ്മീഷനെ അറിയിക്കണമെന്നും ശോഭാ കോശി അധ്യക്ഷയായ ഡിവിഷന്‍ ബെഞ്ച് ആവശ്യപ്പെട്ടു.
