Home » കലാസാഹിതി » പാട്ടുപെട്ടി » കേൾക്കാം കോഴിക്കോടിന്റെ മെഹ്‌ഫിൽ

കേൾക്കാം കോഴിക്കോടിന്റെ മെഹ്‌ഫിൽ

കോഴിക്കോട് അബ്ദുൾ ഖാദറിന്റെയും എം എസ് ബാബുരാജിന്റെയും കാലത്ത് പ്രസിദ്ധിയിൽ നിന്നകന്നു നിന്ന കോഴിക്കോട്ടെ സൂഫി സംഗീതഗുരു രാഗ് അബ്ദുൾ റസാഖ് പതിറ്റാണ്ടുകൾക്കു ശേഷം പൊതുവേദിയിൽ പാടുന്നു. കോഴിക്കോടൻ ദേശി സംഗീതത്തിന്റെ എന്നും പ്രിയപ്പെട്ട അവതരണ വേദിയായ ടൗൺ ഹാളിൽ സെപ്തംബർ ആറിനാണ് പരിപാടി.
ഇക്കണ്ട കാലമത്രയും എല്ലാ ഇനം സാംസ്കാരിക സംഘാടകരും തമസ്കരിച്ച, എല്ലാത്തരം പൊലിമകളിൽ നിന്നും ഒഴിഞ്ഞു നിന്ന് ഒരു കാലഘട്ടത്തിന്റെ ശബ്ദസംസ്കാരത്തെ ധ്യാനപൂർവം സംരക്ഷിക്കാൻ ജീവിതം ഉഴിഞ്ഞുവച്ച ഉസ്താദ് റസാഖ് ഭായി കാൽനൂറ്റാണ്ടിന്റെ ഇടവേള അവസാനിപ്പിച്ചാണ് കോഴിക്കോടിന്റെ ഓണം- ബക്രീദ് നാളുകൾക്ക് ശുഭാരംഭം കുറിയ്ക്കുക.

ആദ്യം, രാഗ് റസാഖിന്റെ കാലത്തെയും കലാജീവിതത്തെയും മുൻനിർത്തി കോഴിക്കോട്ടെ ആർടിസ്റ്റ്സ് കളക്ടീവ് നിർമ്മിച്ച ഡോക്യുമെന്ററി പ്രദർശിപ്പിക്കും. പിന്നെ റസാഖ് ഭായ് അവതരിപ്പിക്കും, കോഴിക്കോടിന്റെ മെഹ്‌ഫിൽ ഭൂതകാലം യഥാർത്ഥത്തിൽ എങ്ങനെയായിരുന്നുവെന്ന്. മലബാറിലെ മാളികപ്പുരകളിലും തറവാട്ടു കോലായകളിലും ക്ലബ്ബുകളിലും കല്യാണങ്ങളിലും പാടിപ്പാടിയുറച്ച മെഹ്‌ഫിൽ സംസ്കാരത്തിന്റെ തൽസ്വരൂപം എന്താണെന്ന്.

Leave a Reply